|
ՈՐՈՇԱԿԻ ԺԱՄԿԵՏՈՎ ԱՇԽԱՏԱՆՔԱՅԻՆ ՊԱՅՄԱՆԱԳԻՐԸ ԲԱՑԱՌՈՒԹՅՈՒՆ Է Մասնակցել եմ մրցույթի, որտեղ նշված է եղել, որ հաղթելուց հետո պետք է մշտական հիմունքներով աշխատեմ: Անցել եմ մրցութային փուլը, սակայն ինձ հետ կնքել են մեկ տարով պայմանագիր: Պայմանագրի ժամկետը լրանալուց հետո այդ հիմքով ազատել են աշխատանքից: Գործատուն ճիշտ է վարվել, թե ոչ: Մ. Հ. /ք. Երևան/: -Համաձայն ՀՀ Աշխատանքային օրենսգրքի 94-րդ հոդվածի` օրենսդրի կողմից նախատեսվել է աշխատանքային պայմանագրի կնքման ժամկետին վերաբերող սահմանում, որի համաձայն` աշխատանքային պայմանագիրը կնքվում է. 1) անորոշ ժամկետով, եթե աշխատանքային պայմանագրում դրա գործողության ժամկետը նշված չէ,
Միաժամանակ, նույն օրենսգրքի 95-րդ հոդվածով (1-ին կետ) սահմանվել է` որոշակի ժամկետով աշխատանքային պայմանագիր է կնքվում, եթե աշխատանքային հարաբերությունները չեն կարող որոշվել անորոշ ժամկետով` հաշվի առնելով կատարվելիք աշխատանքի բնույթը կամ կատարման պայմանները, եթե սույն օրենսգրքով կամ օրենքով այլ բան նախատեսված չէ: Նշվածով օրենսդիրը գործատուին է տվել որոշակի ժամկետով աշխատանքային պայմանագրի կնքման հնարավորություն, սակայն նախատեսելով որոշակի սահմանափակումներ: Ասվածից հետեւում է, որ գործատուն որոշակի ժամկետով աշխատանքային պայմանագիր կարող է կնքել, եթե աշխատանքային հարաբերությունները չեն կարող որոշվել անորոշ ժամկետով` հաշվի առնելով կատարվելիք աշխատանքի բնույթը կամ կատարման պայմանները: Ավելին, ՀՀ Աշխատանքային օրենսգրքի 95-րդ հոդվածի 3-րդ կետով նախատեսվել են այն դեպքերը, թե երբ կարող են նաև կնքվել որոշակի ժամկետով աշխատանքային պայմանագրեր, որոնք հանդիսանում են բացառություններ: Այսինքն, որոշակի ժամկետով աշխատանքային պայմանագիր կարող է կնքվել նշված իրավական դրույթով սահմանված բացառիկ դեպքերում: Հետեւապես, որոշակի ժամկետով աշխատանքային պայմանագիր չի կարող կնքվել այն դեպքերում, երբ աշխատանքային պայմանագրով կատարվելիք աշխատանքն աշխատանքային հարաբերություններում կրում է մշտական բնույթ: Իսկ ՙմշտական բնույթ՚ սահմանումը կրում է լայն իմաստ, որտեղ աշխատանքի կատարումը ունի սկիզբ, շարունակական և անընդհատ կատարման բնույթ: Ընդ որում, աշխատանքի ոլորտը եւ աշխատանքային գործառույթները կարող են լինել տարբեր: Այդ իսկ պատճառով օրենսդիրը սահմանել է այն դեպքերը, որոնց հիմքով կնքվում է որոշակի ժամկետով աշխատանքային պայմանագիր:
|