- Մայրս Հայրենական պատերազմի տարիներին եղել է Լենինգրադի բլոկադայի մասնակից: Պատերազմից հետո ուսանել է, այնուհետ և վարել բարձր պաշտոններ, ստացել կառավարական պարգևներ ու շքանշաններ, ինչպես նաև` բազմաթիվ հուշամեդալներ ու նշաններ: Երկու ամիս առաջ հանկարծամահ եղավ: Դիմել եմ նոտարական գրասենյակ,  որպեսզի ընդունեմ ժառանգությունը`  հայտարարագրելով ինչպես անշարժ գույքը, այնպես էլ` պետական պարգևները, շքանշանները և հոբելյանական հուշամեդալներն ու նշանները: Նոտարն ինձ տեղեկացրեց, որ բոլոր պետական պարգեւները, մեդալներն ու շքանշանները, այդ թվում հոբելյանական նշանները,  չեմ կարող ժառանգել: Արդյո՞ք  այդպես է:

Պետական պարգևները եւ շքանշանները, որոնց ժամանակին արժանացել է Ձեր մայրը, օրենքի ուժով չեն մտնում ժառանգության զանգվածի մեջ: Սույն իրավանորմով օրենսդիրն անթույլատրելի է համարում պետության կողմից տրված պարգևները եւ շքանշանները ժառանգել, ուստի այդ դրվագով նոտարի կողմից տրված տեղեկատվությունն իրավաչափ է:

Ինչ վերաբերում է հուշանշաններին և այլ նշաններին, որը ժամանակին ձեռք է բերել Ձեր մայրը կամ հանձնվել է վերջինիս, ապա դրանք մտնում են ժառանգության զանգվածի մեջ եւ ենթակա են ժառագման:

Հարկավոր է իմանալ.

Պարգևատրված անձի մահվան դեպքում պետական պարգևները և դրանց վկայականները կարող են որպես հիշատակ պահվել նրա ժառանգների մոտ կամ վերջիններիս համաձայնությամբ հանձնվել թանգարաններին: Պետական պարգևները թանգարաններին են հանձնվում Հայաստանի Հանրապետության նախագահի աշխատակազմի գիտությամբ:
Եթե պարգևատրված անձը չունի ժառանգներ, նրա մահվանից հետո պետական պարգևները և դրանց վկայականները վերադարձվում են Հայաստանի Հանրապետության նախագահի աշխատակազմ (ՀՀ<<Պետական պարգևների մասին>>օրենքի 17-րդ հոդված):